UNA SCAPPATA

Purtatu da un ventulellu
U ghjornu pianu finisce,
Mi porta cum'un riposu
Dentu ancu à l'acellu
Chì à u luntanu sparisce
Un volu più graziosu.

U sole si n'hè andatu
À fà lume à l' atru mondu,
Face locu à la luna
In 'ssu celu tantu stellatu,
U mo sguardu trova ribombu
In 'ssi culori di furtuna.

Mi carezza lu ventulellu
Hè serenu stu mumentu,
Ponu cantà e malacelle
À l' intornu di u castellu,
Nun mi portanu spaventu
Sottu à lu focu di e stelle.

Cum'è quandu nasce un fiore
A cuscenza di a natura
Mi ralegra cù amore,
Quand'ella m' offre e so ore
Cù la so mente sicura
Mi lascia cum'un favore.

L' arburu perde e so fronde
Fendu un mantellu à la terra,
Copre cusì i chjassi
È à l'ombra di ste stonde
In sti lochi di a serra
Vuleria perde li mo passi.

La mo scappata stasera
Mi stinghje è nun fughju,
L'aghju apertu le mo porte
È u mo core ùn' addispera,
Per nun rompe un silenziu nun mughju
Offrendu la mo anima à sta notte.

GHJANPA