GHJUVAN BATTISTA

Oghje vene lu tempu
Chì copre d'un velu à bughju
E lacrime d'un pientu,
Si stringhje dinù un pugnu
Per tene in stu spaventu
U silenziu d'un mughju...

Sunate a campana
Scrivite à le ghjente,
A dulente partigiana
A morte d'un militente,
Issa lotta umana
Ci ferma la so mente...

O bandera in dolu
Quì, di rabia cunscente
Ti portu torna à collu,
Possa u Moru fà sente
A fede d'un figliolu
Chì ci racoglie suvente...

Lu viaghju si face
In lu to campusantu,
Ci ai trovu la pace
Tù a vulia accantu,
Hè cum'un fiore chì nasce
Per ella luttasti tantu...

Ti ricordu o amicu
È pregu sù la croce,
A nutizia ch'èo dicu
Frà lu ventu di e foce,
Canterà lu casticu
Chì hà spentu la to voce...

GHJANPA