IN FOLA FULETTA

PRUVERBII :

L' omi chì anu sempre i so panni assesti sò l' onore di e so donne.

Ghjennaghju cutrura,ferraghju patura, marzu asciuttu,aprile bagnatu,beatu à chì hà suminatu.
____

PUESIA

PARCHI ?

U me ricordu di té
Si ne scappa longu u mari,
Cum' un albori smarittu
Chì sparisci a l' orizonti.
È mi dumantu, parchì ?
Un ci semu tenuti cari,
Parchi iss' amori hé svanitu
Cum' u soli trà li monti.

u pastori bunifazincu
_____

Paghjelle

da u Boziu
Credi puru ciò ch' eo dicu o mondu disgraziatu
Diu à tè t' hà fattu astutu è à mè scemu sunatu
Finch' aghju di ste berette ùn mi ne vò scapigliatu.

Da u Petrosu
Dicenu chì à l' atru mondu si passa una vita nova
Si riscontra l' amanti è l' amore si rinnova
S' ellu fussi vera questa ne parteria à tutt' ora.

Da Benedettu Sarocchi ( Rusiu)
Ci ne vole à fà di menu mi ne stò cottu da lu sole
Ne sò tantu stindicatu ch' ùn possu mancu discorre
Cercatine puru un antru sè tù voli fà l' amore