O Ma...scusa u dulore
Di questa puesia,
À le mo ultime ore
Stà forte è cusi sia,
Per fà sempre onore
À tuttu lu mo amore..
Stamane sò cascatu
Sottu e palle di un nemicu,
Perdonali 'ssu fattu
Serebbe statu forze un amicu,
In stu mondu ingratu
Chì oghje m' hà cundannatu...
In stu ultimu ghjornu
Ti sentu tantu vicina,
Ùn aspetti più ritornu
È preghi in sta matina,
Ma nùn vogliu chì lu ventu
Faccia sente lu to piantu...
O Ma...dammi la to manu
È portami cum'è prima
À li Pantani...per lu Rumanu,
U mo core è la mo anima
In stu ritrattu luntanu
À lu mo ricordu steranu...
Sentu dinù la to voce
M' addurmintava la riturnella...
Sè m' accumpagna oghje la croce
Fà cantà una messe in paghjella...
Per u to figliolu suldatu
Chì a guerra t'hà pigliatu...
Ma nùn vogliu...o Ma
Onori d' una patria...
Prumetttemi sta chjama
È chì in lu to core stia
Sempre quellu zitellu
Chè tu putarsti in camancellu...
O Ma...chì ghjè stu lume
Chì vegu cum' una stella?
Dimmi o Ma Cume...
Dimmi ...o Ma...
GHJANPA
fiura: lettre-ouverte.allmyblog.com
1 commentaires:
Mi piaci monda!!!
hè propriu cummuventi ..
Allora , socu d'accunsentu incu cio ch'aveti scrittu .
Hè vera chi ci voli ad'avè un certu spiritu, una manera di pensà, di campà, di creda , ... d'essa !!!
Ma quandu dicu "cercu di fà tuttu pà diventalu un ghjornu" un hè micca par di chi si diventa pueta , cumu si impara un mistieru …
Si nasci incu una predispusizioni , quissa mi pari certu !!!
Ma un aghju chi 18 anni , u caminu hè beddu longu dino, hè par quissa chi dicu chi facciu di tuttu , mi intaressu a la natura , la vita d'oghji é d'arrimani , l'amori ...
Tutti issi sughjetti chi si trovanu u piu attraversu i me testi.
« Pueta un mi possu chjamà
Chi socu un ghjuvanottu
Mi tocca sempri hà scavà
Nanzi di fà u me ciottu
Ma la vodda d’amparà
Scorri in me a dirottu »
U facciu pà u piaceri , parchi a scrittura hè diventata un piaceri inanzi tuttu (chi un contu piu l'ori !!), scrivu dino parchi u vecu cumu un duveri dino , un duveri di moscia a l'aghjenti chi un si devi perda a noscia lingua, a noscia scrittura , chi c'hè stata insegnata da l'antenati .
Eccu u me penseru …
Cuntinuemu puri a parlà, cumunicà , chi par me hè monda interessanti … speru dino par vo .
A PRESTU
U PASTORI BUNIFAZINCU
Enregistrer un commentaire